Gerðu góðan díl

London er beinlínis morandi í mörkuðum!

London er svo sannarlega borg verslunar, eins og margir Íslendingar gjörþekkja. Þó þekkja ekki allir hvílíkt úrval útimarkaða er að finna þar um slóðir. Þar er ekki bara skemmtilegt að versla, heldur er þarna að finna Lundúnabúann í sínum náttúrulegu heimkynnum! Þarna geta ferðamenn virkilega fengið að kynnast kjarna borgarinnar og kynnst þáttum mannlífsins sem hafa verið við lýði um áratugi og –hundruð og hafa varðveist vel. Við ætlum að segja ykkur sitthvað af mörkuðum borgarinnar og byrjum auðvitað á því besta!

Spitalfield Market:

Ef við ættum að mæla með einum markaði til að heimsækja, þá yrði það Spitalfields markaðurinn í austurhluta London – en hann er einna veglegastur á sunndögum og ætti helst helst að heimsækja þá. Hann er einna fjölbreyttastur í vöruúrvali og verðflokkum og aðalsmerki hans eru ungir og upprennandi hönnuðir, svo þar má oft finna flottan varning á fínum prís! Þá er þar að finna allt frá hundgömlum myndavélum og vínylplötum yfir í glænýja hönnun og heimilisprýði. Þar má kaupa mat á veitingastöðum eða af markaðsstöndum og fyrir þreytta og lúna er um að gera að skella sér í nuddstól og fá hvíld meðan hinir orkumeiri halda áfram að skoða sig um. Ýmsar sértækari verslanir er að finna í kring um markaðinn og oft hófu þær göngu sína sem standar inni á markaðnum. Þess má geta að alþjóðlega fatamerkið All Saints var fyrst í boði þar og er fyrsta All Saints verslunin enn rekin í næsta húsi.

Skammt undan er Brick Lane sem er mekka indverskra matsölustaða í borginni, en þar er líka að finna Brick Lane markaðinn, þar sem boðið er upp á samansafn ýmiskonar varnings. Það er stórskemmtilegt að enda daginn á góðum indverskum mat en inn á flesta veitingastaðina má taka með sér aðkeypta áfenga drykki (og þá er gott að vita að Tesco er skammt undan!). Fara ber með varúð um Brick Lane, en veitingastaðirnir reyna allt til að fá gesti og gangandi inn til sín – en það er líka partur af upplifuninni! Fyrir þá sem vilja síður taka sénsa er óhætt að mæla með veitingastaðnum Aladin – en hann er jafnan þétt skipaður svo það er eins gott að vera tímanlega!

Til að komast á Spitalfields er best að taka Central Line (rauðu línuna) að Liverpool Street, fara út Bishopsgate megin, beint yfir götuna, til vinstri og svo til hægri þar sem opnast breið göngugata inn að markaðnum. Annars er um að gera að spyrja til vegar – og hafið í huga að lang best er að heimsækja hann á sunnudögum.

Aðrir markaðir í London:

• Covent Garden Market
• Borough Market
• Camden Market
• Notting Hill Market
• Gray’s Antiques Market
• Chelsea Antiques Market
• London Silver Vaults
• Brixton Market
• Gabriel’s Wharf og Riverside Walk Book Market

Allt um Spitalfield markaðinn

Myndin eru birt með góðfúslegu leyfi Spitalfields Market

Þar sem fagmennirnir fara í söfn, er þér óhætt

Safnaflóran í London blómstrar allt árið.

Það gildir einu hvenær árs þig langar að kíkja til London til að göfga andann. Heimsborgin býður gestum sínum alltaf upp á heilmikla menningar- og listaveislu þar sem úrvalið er hreint ótrúlegt og oft erfitt að velja.

Nú geta íslenskir heimsborgarar gert enn betur og fengið leiðsögn um helstu listamusteri London á ástkæra ylhýra móðurmálinu.

Art Tours (eða öllu heldur María Hilmarsóttir eins og hún heitir skv. Þjóðskrá) býður upp á hreint stórskemmtilegar og einnig glettilega fræðandi ferðir í British Museum, auk þess sem hægt er að panta leiðsögn í The National Gallery.

Allt um Art Tours

Dagar víns og osta

Gordon's er elsti vínbarinn í London.

Ef þú og ferðafélagar þínir viljið eitthvað meira spennandi en volgt öl prófið þá að reka inn nefið á Gordon's Wine Bar, rétt hjá Embankment lestarstöðinni.

Þegar þið hafið fetað ykkur niður nokkrar þröngar tröppur bíður ykkar freistandi úrval vína af ýmsu tagi og illa þefjandi osta þeim til samlætis. Á Gordon's er setið við kertalýst borð sem kúra í myrkum skotum. Þegar þau fyllast (sem gerist fljótt) er gestum boðið að njóta veiganna á gangstéttinni fyrir framan staðinn.

Kannski ekki alveg jafn rómantískt en að minnsta kosti verður lyktin af ostunum ekki jafn áberandi.

Gordon's Wine Bar, 47 Villiers Street

Hátt uppi

Svipað og Perlan, nema upp á endann

Ef þínar hugmyndir um góða skemmtun ganga út á að hanga í læstri glerkúlu með 25 ókunnugum í 130 metra hæð þá ættirðu ekki að sleppa London Eye.

Frá aldamótum hafa gestir í þessu stærsta Parísarhjóli heims (má ekki kalla það Parísarhjól þótt það sé í London?) skoðað borgina miklu í krók og kring í orðsins fyllstu merkingu. Það tekur hálftíma að fara hringinn og vonandi sérðu meira en bara þokubakka.

London Eye, við Thames nálægt Westminster. Kostar 13 pund en þú færð 10% afslátt ef þú bókar fyrirfram

Haltu höfði

Í Tower of London er betra að vera túristi en eiginkona Hinriks VIII.

Í gegnum aldirnar hafa margar af helstu afhausunum Breta, meðal annars á óheppnustu eiginkonum Hinriks VIII, farið fram í turninum, sem nú er meðal frægustu túristastaða borgarinnar. Talandi um framfarir.

Meðal hápunkta er skartgripasafn drottningarinnar, vopnasafn hirðarinnar og sýning á nokkrum sniðugum píningartólum fyrri alda.

"Buffæturnar" sem ættu að vera gindrykkjumönnum góðkunnar, gæta hrafnanna sem eiga bústað í turninum. Þjóðsagan segir að meðan hrafnarnir halda til í turninum sé Bretland öruggt fyrir innrás − nema ef til vill innrás ferðamanna.

Tower of London, 15 pund fyrir fullorðna

Græðgi er góð

Automat er Hamborgarabúlla breskra bankamanna

Andi Manhattan svífur yfir leðurklæddum innréttingunum á Automat, nýjum veitingastað í Mayfair sem sækir innblástur til hins hefðbundna ameríska diners.

Þegar samningurinn er í höfn má sjá bankamenn háma í sig borgara á svörtum leðurbekkjum innan um dökkan panelinn. Steikurnar eru að sögn löðrandi í velmegun.

Automat, 33 Dover Street í Mayfair-hverfinu

Þú sást myndina

Nú er komið að þér að láta sjá þig í Notting Hill.

Þú finnur líklega hvorki Hugh Grant né Júlíu Roberts á vappi á götum Notting Hill en það er nóg af öðru í þessu hverfi London til að gleðja augað.

Ef þú þreytist á mannþrönginni við Oxford Street, kíktu þá á Portobello Road á laugardagsmarkaðinn sem er stærsti antíkmarkaður í heimi fyrir utan Ebay. Ef þú ert á ferðinni í ágúst, geturðu líka hitt fyrir ennþá meiri mannþröng á hinni mögnuðu kjötkveðjuhátíð, Notting Hill Carnival.

Notting Hill, vestur af Hyde Park

Strákarnir í borginni

Nokkrar tillögur að áhugaverðum áfangastöðum fyrir samkynhneigða í London.

Það er hreinlega endalaust úrvalið af stöðum fyrir samkynhneigða í London. Til dæmis er alltaf skemmtilegt að rölta niður á Old Compton Street og virða fyrir sér hinsegin mannlífið sem ekki fer framhjá nokkrum manni.

Í Soho er síðan hægt að finna fullt af vinsælum skemmtistöðum  fyrir samkynhneigða, eins og Heaven og G-A-Y. Admiral Duncan og Comptons of Soho eru líka sívinsælir barir meðal hommanna á meðan lesbíurnar leggja leið sína á Rush Bar.

Sem sagt, eitthvað fyrir alla í höfuðborg Bretlands.

Meiri þrælhýrar upplýsingar um London

Kaupmaðurinn á horninu

Þar sem fagmennirnir versla er þér óhætt.

Áttu tugi þúsunda króna (eða punda) aflögu? Í hinni heimsfrægu verslun Harrod's geturðu skilið við reiðuféð þitt og notið þeirrar sérstöku skrúðgöngu bresku efri stéttanna og gónandi túrista (það myndi vera þú).

Verslunin sem er í Knightsbridge hverfinu er sannkölluð stofnun sem býður upp á allt frá nýjustu tísku til matsalar sem fær munnvatnið til að renna hjá hörðustu sælkerum.

Þú munt líklega ekki hitta á eigandann Mohammad al-Fayed en það er erfitt að komast hjá því að sjá hið fáránlega (og) íburðarmikla minnismerki sem hann hefur reist í minningu sonar síns og vinkonu hans Díönu prinsessu.

Harrod's, í Knightsbridge

Ekki bara menn í sokkabuxum

Söngleikir, leikrit og tónleikar með litlum fyrirvara og á góðu verði.

Ertu lítið fyrir að skipuleggja þig margar vikur fram í tímann? Eða áttu skyndilega laust kvöld í London?

Komdu við í afsláttarboxinu við Leicester Square einhvern tímann um daginn og veldu milli íburðarmikilla söngleikja, Sheikspírskrar skrúðmælgi eða síðustu uppfærslunnar með Hollywoodleikara sem vill ólmur láta taka sig alvarlega. Þú getur fengið miða á frábærar sýningar á spottprís. Gerðu bara ekki ráð fyrir að fá Business Class sæti!

Yfirlit yfir næstum allar leiksýningar í London